Desenvolvemento de dispositivos de fotónica integrada

O título de Experto busca a capacitación en deseño, medida, fabricación e empaquetado de dispositivos fotónicos e electrónicos. Os diferentes módulos son auto contidos, cunha importante formación práctica, co fin de preparar aos participantes para a súa incorporación á crecente oferta de postos cualificados en plantas de deseño e produción de chips fotónicos. A meirande parte da
formación levarase a cabo no Campus da Universidade de Vigo en Lagoas-Marcosende, con certa formación adicional no Laboratorio Internacional Ibérico de Nanotecnoloxía, en Braga.

Esta formación está especialmente dirixida a estudantes e titulados universitarios no ámbito da tecnoloxía, principalmente Física e Enxeñerías, como Telecomunicación, Electrónica, Mecánica,… ou outros profesionais con experiencia laboral no ámbito da formación.
Para o acceso a o título de experto:
-Estar en posesión dun título universitario dentro do EEES, que outorgue acceso a ensinos oficiais de posgraduado.
-Estar en posesión dun título estranxeiro, alleo ao EEES, homologado a un título universitario oficial do EEES.
Para o acceso aos títulos modulares:
-Ter superados un mínimo de 120 ECTS nunha titulación universitaria oficial dentro do EEES ou equivalente.
-Estar en posesión dun título universitario dentro do EEES, que outorgue acceso a ensinos oficiais de posgraduado.
-Estar en posesión dun título estranxeiro, alleo ao EEES, homologado a un título universitario oficial do EEES.
-Ser profesional con acreditación de experiencia laboral, sempre que estea relacionada coas competencias inherentes ao título e cumpran os requisitos de acceso á universidade segundo a normativa vixente.

Os campos específicos aos que os estudantes poden acceder profesionalmente tras finalizar o curso
son cada vez máis amplos dado o carácter interdisciplinario e a crecente importancia da fotónica, que, como xa se indicou, foi seleccionada como una das cinco KET pola Unión Europea, e máis en particular da fotónica integrada. Aqueles participantes que cursen todos os módulos da presente formación adquirirán os seguintes coñecementos e capacidades: deseño e proba de PICs baseados en
dispositivos pasivos e activos; deseño e proba de compoñentes electrónicos pasivos de alta velocidade; principios da fabricación de PICs en sala limpa; empaquetado de PICs en módulos; aplicación da fotónica ao procesado cuántico; xestión de proxectos e transferencia tecnolóxica.

Capacidade de comprensión das distintas disciplinas involucradas na fotónica
Entender o proceso de deseño e proba de dispositivos fotónicos tanto activos como pasivos
Entender o proceso de deseño e proba de compoñentes electrónicos pasivos de alta velocidade
Manexo de ferramentas para o deseño de circuítos integrados fotónicos
Coñecer os principios de fabricación de PICs en sala limpa
Entender e manexar as ferramentas para o empaquetado de PICs en módulos
Capacidade para simular e probar circuítos fotónicos con aplicacións cuánticas

• CT1 Capacidade para xestionar proxectos tecnolóxicos
• CT2 Coñecementos de xestión de activos de propiedade intelectual e industrial

A Dirección do título poderá realizar entrevistas persoais de consideralo oportuno para unha mellor comprensión dos méritos alegados, e poderá establecer novos criterios compatibles cos anteriores para concretar a aplicación dos principios e criterios enunciados. Nese caso, a puntuación será:
Currículo 60%,
Carta de motivación: 20%,
Entrevista persoal: 20%.

• Asistencia ás clases
• Probas e exercicios de avaliación continua que se irán facendo durante o curso
• Avaliación dos informes de prácticas
• Cuestionarios
• Avaliación do traballo final presentado

Experto/a universitario en desenvolvemento de dispositivos de fotónica integrada

Este programa formativo está financiado polo Ministerio de Asuntos Económicos e Transformación
Dixital a través da Secretaría de Estado de Telecomunicacións e Infraestruturas Dixitais a través da convocatoria de axudas destinada a financiar, con fondos do Mecanismo Europeo de Recuperación e Resiliencia, a creación de Cátedras Universidade-Empresa no período 2023-2027 cuxa actividade está centrada na investigación, difusión e formación en distintas áreas de aplicación da microelectrónica.
As bases desta convocatoria (poden consultarse aquí https://portalayudas.mineco.gob.es/catedras-chip/Paginas/Index.aspx ), establecen que a formación debe ser gratuíta para todos alumnos.