Ambas entidades asinaron este luns un convenio de colaboración
Entre as novidades que a Universidade de Vigo ofertará o vindeiro ano académico dentro do seu catálogo de titulacións propias está o Curso de Experto en Tecnoloxías Aplicadas ás Enfermidades Respiratorias. Trátase dunha formación innovadora e especializada orientada a desenvolver competencias e habilidades que permitan dar resposta de alto nivel e liderar accións de mellora en todos os aspectos relacionados coas tecnoloxías diagnósticas e terapéuticas aplicadas ás enfermidades respiratorias.
Para poñer en marcha este curso de experto, que se imparte ao abeiro do Centro de Posgrao e Formación Permanente (CPFP), a Universidade de Vigo alíase coa Fundación de Investigación Biomédica Galicia Sur, entidade coa que este luns asinaron un convenio de colaboración. Xunto co reitor da UVigo, Manuel Reigosa, asistiron ao acto a directora Fundación Pública Galega de Investigación Biomédica Galicia Sur, Beatriz Gil de Araújo; o xefe do Servizo de Neumoloxía da Área Sanitaria de Vigo e coordinador do curso, José Alberto Fernández Villar e o xerente da Área Sanitaria, Javier Puente Prieto, así como o director do CPFP, Fernando Cerdeira.